Mga drug surrenderers sa Tanza Esperanza, City Proper, naga-upod sa pagronda sa barangay
Iloilo City–Naga-upod sa pagronda sa barangay ang mga drug surrenderers sa Barangay Tanza Esperanza, City Proper.
Suno kay Punong Barangay Nene Odicta, nagbag-o na 100% ang mga drug surrenderers kag wala na nagbalik sa paggamit sang illegal nga druga ilabe na nga gintutukan gid sila sang barangay council para mabuligan. Kada Miyerkules suno kay Odicta, nagarecorida ang council sa barangay kag nagahanumdom sa pumuluyo nga likawan ang druga, kada Sabado ginatipon man ang surrenderers sa kapelya para sa sige-sige nga counseling.
Kada gab-i, ginapa-upod ang mga surrenderers sa pagronda sa barangay kada las-8, las-10 kag las-12 sa tungan gab-i para masiguro nga wala na sang nagalagaw para maghimo sang illegal. Kun may indi kilala nga magsulod sa barangay sa gab-i, ginadakop ang mga ini kag ginareport sa Iloilo City Police Office.
Nagkomiter suno kay Odicta ang mga surrenderers nga mabag-o na kag bisan siya mismo nagpakitluoy sa mga ini nga talikdan na ang ila bisyo. Kaina sang aga, nagpa-drug test ang mga drug surrenderers sa Tanza Esperanza. (AGB)