Pila ka mga konsehal, indi pabor sa plano ni Mayor Jed mabilog nga hatagan ang mga traffic aides sang porsyento sa mga traffic violators nga ila madakpan

Iloilo City — Indi pabor si Councilor Jeffrey Ganzon sa plano ni Mayor Jed Mabilog nga hatagan sang porsyento ang mga traffic enforcers halin sa penalidad sang ila nadakpan nga nagalapas sa traffic rules. Suno kay Ganzon mas maayo kun ipaidalum sa retraining ang mga traffic enforcers, disiplinahon kag tudluan sang husto nga paminatasan.

May posibilidad man suno sa iya nga mangin unfair sa mga drivers bangud posible nga magpinagusto sila sa pagpangdakop.

Para kay Councilor Joshua Alim, dapat anay tun-an sang maayo ang proposal. Sa text message nga ginpadala ni Alim, may posibilidad nga mangin ineffective ang mga traffic enforcers bangud mangin motivated sila sang incentives kag indi na sila makaubra sang husto.

Nagapangayo naman sang tion si Councilor Armand Parcon nga panumdumon apang indi siya pabor sa plano. May sweldo man suno sa iya ang mga traffic auxiliaries agud nga mag-ubra sang husto.

Pabor naman si Councilor R Leone Gerochi sa plano ni Mabilog nga hatagan sang porsyento ang mga traffic auxiliaries. Suno kay Gerochi, wala motivation ang mga traffic auxiliaries bangud manubo ang ila nga sweldo kag dako ang posibilidad nga matentar nga mangilkil.

Samtang ginpahayag ni Councilor Ely Estante nga dapat anay testingan ang paghatag sa ila sang porsiyento kag kun makit-an nga bentaha para sa city govt kag sa pumuluyo, padayunon ang plano. (JoMaque)