25-anyos nga dalaga sa Cabatuan nga may diperensya sa paminsaron, wala na sang chansa nga magbalik sa normal suno sa doktor
Iloilo City — Wala na sang chansa nga magbalik sa “normal” ang paminsarun ni alyas Matsay. Ini ang pahayag ni Dr. Mary Christine Te, ang doctor-in-charge kay Matsay sa Western Visayas Medical Center.
Suno kay Dr. Te, tinguhaan na lang nga ma-manage ukon makontrol ang pagwaras, pagka-bayolente, pagliho-liho ukon pag-uba sang panapton ni Matsay paagi sa sige-sige nga pag-inom sang bulong.
Ginpahayag ni Dr. Te nga chronic na ang sitwasyon ni Matsay bangud madugay na niya ini nga ginasuprer. Sa sulod sang isa ka bulan, kun mag-sige sige suno sa doktor ang maayo aktuwasyon ni matsay, pwede na siya nga ma-discharge sa ospital. Apang kinahanglan nga padayunon ang pag-inom sang bulong kag padayunon man ang pagpa-check up sa iya.
Apat ka mga bulong ang gina-inom ni matsay lakip na ang isa ka injectibles. Daku ang pagpasalamat ni alyas Mila, ang iloy ni Matsay sa bulig sang Aksyon Radyo, DOH, DSWD, LGU sang Cabatuan kag mga brgy officials sa ila lugar sa paghatag atensyon sa iya problema. Ginpabutyag naman ni Mila nga kinahanglanon gihapon ang balay-balay nga butangan kay matsay kun makaguwa na gid man sila sa ospital. (JoMaque)