ArchivesLokal

(UPDATE) Pulis sa Lapaz, nanginwala nga nagpadihot agud malakip sa drug list ang pila ka residente sa Alalasan, Lapuz

Iloilo City–Ginpanghiwala ni PO1 Johnny Delgado assign sa Lapaz Police Station nga ginmatu-matuhan niya ang pagbutang sang pangalan sang pila ka mga pumuluyo sang Alalasan, Lapuz sa listahan sang mga drug personalities.

Suno kay Delgado, una niya nakita ang mga pangalan sa report sang PDEA kag CIDG sa conference sa Iloilo City Police Office angut sa high value target drug personalities. Na-verify na suno sa iya sang natungdan nga mga law enforcement units ang mga pangalan. Ginmanduan siya nga ipahibalo sa mga na-identify nga residente ang paglakip sang ila pangalan bangud sa isa lang sila ka barangay naga-istar.

Nagreklamo sa Aksyon Radyo Iloilo sanday Barangay Tanod Rregie Alegria kag Barangay Clerk Jeffrey Nuñez sang nalakip ang ila pangalan sa drug list kag nagpanindugan nga indi sila involved sa illegal drugs. Magluwas sa duha, nalakip man sa listahan sanday Christopher Talento, Tirso Regalado kag Alberto Bonitez.

‘Wala sang kahilabtanan’

Gindepensahan naman ni Alalasan Punong Barangay Maricon Sumpio ang lima kag ginapanindugan nga wala sila sang involvement sa illegal drugs.

Nagapati si Sumpio nga paghingabot ang motibo ni PO1 Delgado bangud sa pulitika kag luyag lang suno sa iya nga higkuan ang iya pangalan kag paguwaon nga nagapabaya siya sa problema sa illegal nga druga sa barangay. Suno pa kay Sumpio, nagpamahog na sadtu si Delgado sa ila nga mabalos kun ma-assign siya sa Lapaz Police Station. (AGB)

Leave a Reply