(UPDATE) Warden sang Iloilo District Jail, nagpanindugan nga wala sang iregularidad sa presuhan

Pototan, Iloilo–Nagpanindugan si Jail Warden Abner Zamora sang Iloilo District Jail nga wala sang iregularidad sa sulod sang presuhan.

Ginpabutyag ni Zamora nga wala niya ginatolerar ang anuman nga illegal nga aktibidad ilabe na sa mga jail officers. Paathag ini ni Zamora kasunod sang alegasyon sang nadakpan nga tokhang surrenderer nga si Josefina Doktora sa buy bust operation sa Barotac Nuevo sang Sabado nga sa IDJ siya nagakuha sang illegal drugs.

Suno kay Zamora, ginpa-imbestigaran na sang Bureau of Jail Management and Penology 6 ang ginbuyagyag ni Doktora.

Ginsugid ni Doktora nga nagakuha siya sang supply kanday alyas Pakloy kag alyas Marco nga inmates sa IDJ. Napatawag na ang duha suno kay Zamora. Ginpanghiwala ni alyas Marco nga naka-istorya niya si Doktora samtang gin-ako ni alyas Pakloy nga na-istorya niya ang babaye. Apang nanginwala si Pakloy nga may ginhatag siya nga illegal drugs kay Doktora. (AGB)