ArchivesLokal

‘Sawayon ang nagapasaway’

Sta. Barbara, Iloilo–Kinahanglan sawayun ang mga nagapasaway. Ini ang paathag ni Monsignor Juanito Tuvilla, kura paruko sang Sta. Barbara Parish, matapos ginreklamo sang retired army nga nagsinggitan kag nagsaway nga untatan ang pagkanta sa sulod sang simbahan sa lubong sang iya iloy.

Ginpanginwala ni Tuvilla nga nagsinggit siya kag gintudlo-tudlo ang hinablos sang tagreklamo nga nagakanta pagkatapos sang misa sa patay. Pero gin-ako sang pari nga nagsaka ang iya tingog agud i-emphasize kun anu ang dapat himuon sang mga nagasulod sa simbahan.

Ginatolerar suno kay Tuvilla ang pictorials matapos ang misa sa patay apang ginadumilian ang necrological service sa sulod sang simbahan. Dapat suno sa iya naglisensya ang pamilya nga makanta ang ila himata.

Gin-ako naman ni Armando Sundia nga napaminsaran niya nga dal-on sa likod sang altar si Tuvilla apang ginpunggan niya ang kaugalingon kag sa baylo, nagpablotter sa police station. Madamo ang nakakita sa insidente suno kay Sundia kag makapamatuod nga nagsinggit si Tuvilla kag ginyawyaw ang iya 16-anyos nga hinablos nga babaye nga nagakanta. (AGB)

Leave a Reply