Shooting incident sa banwa sang San Rafael
San Rafael, Iloilo–Pilason ang security guard sang Palawan Pawnshop sa pagpangluthang kaina sang aga.
Temporaryo nga ginsiraduhan ang establisemento bangud sang natabu. Ginkilala ang napilasan kay Security Guard Ronilo Santianes, 40-anyos sang San Lucas, Barotac Viejo. May pilas man si San Florentino, San Rafael Barangay Kagawad Ronald Ganzon nga nalampos ang ulo sa semento.
Sa imbestigasyon sang San Rafael police, gintuyo ni Kagawad Ganzon nga agawon ang 38-caliber revolver nga service firearm ni Santianes gani nagpukutay sila tubtob natumba kag may naglupok. Ginpahayag nga mabalus ang kagawad bangud nagbaisay ang gwardya kag ang iya balaye nga si San Rafael SB Member Roger Ruto.
May pilas ang gwardya sa wala nga parte sang dughan kag ginsaylo sa Western Visayas Medical Center samtang may pilas sa guya ang kagawad nga ginabulong sa Iloilo Saint Paul’s Hospital.
Narecover sa area ang 38-caliber revolver ni Santianes, kutsilyo kag homemade 12-gauge shotgun. (AGB)