Pulis nga namiesta sa Dumangas, gintiro patay!

Iloilo — Patay ang pulis nga namiesta sa Barangay PD Monfort North, Dumangas kagab-i. Ginkilala ang biktima kay SPO1 Sherwin Arondain, 42-anyos sang Barotac Nuevo. Suno kay Iloilo Police Provincial Office Director Harold Tuzon, assign sa Mandurriao Police Station ang biktima bilang field training officer.

Arestado naman ang suspetsado nga si Rolly Lete alyas Batik, 41-anyos, isa ka panday kag residente sang Barangay Tubungan, Barotac Nuevo. Gintudlo sang mga testigo si Lete matapos may nakit-an nga tinulo sang dugo sa iya pantalon.

Sa imbestigasyon sang kapulisan, nagasakay sa iya motorsiklo si Arondain sang hinali lang nga nagpundo kag may gin-istorya nga duha ka tawo.

May pilas sa tuo nga guya kag wala nga butkon ang biktima suno kay Chief Inspector Hilarion Roga sang Scene of the Crime Operatives (SOCO). Narecover sa crime scene ang magazine sang 45 caliber nga may pito ka cartridges, baseyo sang bala kag mga gamit ni Arondain lakip na ang iya motorsiklo. Ginturn-over naman sang concerned citizen sang pulis ang pusil nga ginapatihan gingamit sa krimen. (JoMaque)