Deklarasyon ni Presidente Rodrigo Duterte sang Martial Law sa Mindanao, maga-agi sa Kongreso

Madugay na dapat gindeklarar ang martial law sa Mindanao bangud sang kalakasan nga ginasabwag sang mga bandido nga grupo.

Reaksyon ini ni House Deputy Speaker kag Capiz Congressman Fredenil Castro kasunod sang pagdeklarar ni Presidente Rodrigo Duterte sang Martial Law sa Mindanao bangud sang pag-atake sang miembro sang Maute group sa Marawi City. Maathag nga nasaad sa konstitusyon suno sa iya nga nga puwede makadeklarar sang martial law ang presidente kun may rebellion ukon invasion sang mga terorista nga grupo.

Kinahanglan naman nga magsumiter sang report ang presidente sa kongreso sa sulod sang 48 ka oras matapos gindeklarar ang 60 ka adlaw nga martial law sa Mindanao.

Suno kay Castro, base sa konstitusyon, iga-review sang Senado kag Kamara kun may basehan ang declaration. Katuyuan man sini nga mahibaluan sang mga pumuluyo kag mga mamalidha nga indi maabuso ang martial rule.

May kinamatarong suno kay Castro ang Senado kag Kamara nga bawion ang Martial Law declaration kun may makita nga wala sang basehan kag palawigon kun kinahanglan. (AGB)