Visayas, posible madalasa sa deklarasyon sang Martial Law bangud malapit lang sa Mindanao

Metro Manila –Posible madalasa ang Visayas sa deklarasyon sang Martial Law bangud malapit lang sa Mindanao kag mahapos masayluhan sang terorista nga grupo pareho sang Maute group nga nagsalakay sa Marawi City kag nagasabwag sang mga kalakasan sa iban pa nga parte sang Mindanao.

Ginpahayag ini ni Presidente Rodrigo Duterte matapos ginpa-athag ang rason sang iya pagdeklarar sang 60 ka adlaw nga Martial Law sa Mindanao nga nag-epekto sang Mayo 23. Suno sa presidente, kon ma-expand ang deklarasyon sa Visayas, mahimo man sini nga isuspender ang writ of habeas corpus sa rehiyon. Pero wala sang dapat kabalak-an suno sa presidente ang mga nagasunod sa laye.

Kon maglab-ut ang terorismo sa Luzon, mahimo suno kay Duterte nga ideklarar niya ang nationwide Martial Law agud maproteheran ang mga Filipinos.

“Wala sang pasin-uhon”

Wala sang pasin-uhon ang government forces batuk sa mga mabato sa ila otoridad kasunod sang 60 ka adlaw nga Martial Law nga gindeklarar ni Duterte sa Mindanao. Gin-athag ni Duterte nga indi lang sa Marawi naga-epekto ang iya mandu kundi sa bilog nga Mindanao bangud sa mga kalakasan sang mga bandido nga grupo.

Ginsulit sang presidente ang iya promisa sang nagapangampanya pa lang ng solbaron niya angtanan nga problema sa Mindanao.   Nagpasalig si Duterte nga gindesinyo ang Martial Law agud mabalik ang law and order sa Mindanao kag wala sang dapat kabalak-an ang mga nagasunod sa laye. (JoMaque)