Miembro sang Maute Group nga nag-atake sa Marawi City, ginapatihan nagagamit sang illegal drugs – Phil. Army

Iloilo –Ginapatihan nga nagagamit sang illegal drugs ang mga miembro sang Maute Group nga naka-away sang government troops sa Marawi City.

Suno kay Philippine Army-1^st Infantry Division Spokesman Lieutenant Colonel Jo-ar Herrera, nakarecover sila sang mga drug paraphernalia sa naagaw nga battle positions sa Maute gani nagapati sila nga drug addicts ang mga miembro sang local terrorist group.  Na-contain na suno kay Herrera ang mga terorisa sa isa ka area nga amo ang ginatutukan sang mga soldado sa clearing operations sa Marawi. Ginabanta sini nga 30 tubtob 40 pa ka maute members lakip si abu sayyaf leader isnilon hapilon ang nagapabilin sa syudad.

Ginpa-athag ni Herrera nga kalabanan sa mga miembro sang maute ang tumandok sang Marawi kag nagdamo ang grupo sang nag-upod ang iban pa nga lawless elements kag armado nga mga grupo.

Naga-okupar sang vantage positions ang Maute suno kay Herrera gani mahinalungon apang mataktika nga nagahulag ang mga soldado agud matapos na ang krisis.

“Indi abusador”

Indi abusador ang mga soldado sang pungsod.  Ginpasalig ini ni Lieutenant Colonel Jo-ar Herrera samtang nagapadayon ang inaway sa Marawi City kag sa tunga sang gindeklarar ni Presidente Rodrigo Duterte nga Martial Law sa Mindanao.

Suno kay Herrera, professional nga organisasyon ang Philippine Army kag nabase sa constitution ang tanan nila nga aksyon gani wala sang dapat kabalak-an nga ma-abusuhan ang Martial Law. Nagpasalig si Herrera nga tinguhaan sang mga soldado nga mabalik gilayon ang rule of law agud makabalik man sa normal ang pagpangabuhi sa Marawi kag sa bug-os nga Mindanao.

Ginpasalig pa ni Herrera nga ginarespeto nila ang tawhanon nga kinamatarung rason nga ginakonsiderar gid ang kabuhi sang mga sibilyan imbes nga magpadaso-daso sa pagamit sang mga hinganiban sa ila clearing operations. (JoMaque)