(UPDATE) LTFRB, ma-isyu sang show cause order batuk sa mga transport groups nga nag-upod sa strike

Iloilo City–Maga-issue sang show cause order ang Land Transportation Franchising and Regulatory Board ukon LTFRB sa mga transport groups nga nag-upod sa strike kahapon kag subong nga adlaw.

Ginpahayag ni LTFRB 6 Director Richard Osmeña nga katuyuan sini nga mapangayuan sang paathag ang mga operators sa ila pag-upod sa strike. Gintumod ni Osmeña ang LTFRB Memorandum Order no. 2011-004 para sa ‘No Strike Policy’ sa diin nasaad ang pagdumili sa mga PUV operators nga maghimo sang protesta nga makahatag sang huol sa publiko.

Ginpasiguro ni Osmeña nga hatagan sang due process ang mga nag-upod sa untat biyahe.

Nahangpan man ni Osmeña ang sentimiento sang transport sector apang indi sabat sa ila problema suno sa director ang untat biyahe.

Ginapa-abot naman sang transport groups ang show cause order halin sa LTFRB. Suno kay Iloilo City Loop Alliance of Jeepney Owners and Drivers Association ukon ICLAJODA President Boyet Parcon, nahibaluan na sang mga nag-upod sa transport strike ang risgo nga pangayuan sila sang paathag sang LTFRB.

Apang wala ini nagpabag-o sa ila desisyon nga ipalab-ot sa gobyerno ang ila kawsa bisan pa nga magutman sila sang duha ka adlaw. Nagalain lang ang bu-ot ni Parcon sa iban nga jeepney operators nga wala nag-upod sa ila protesta kag padayon suno sa iya nga nagapamintaha. (AGB)