ArchivesLokal

Tricycle driver kag tokhang surrenderer sa Molo, nasapwan nga patay sa Jaro!

Iloilo City–Patay na sang nasapwan ang tricycle driver sa Buhang, Jaro kaina sang aga.

Nakita ni Security Guard Elmer Toledo ang bangkay ni Joseph Bahande sang Cochero, Molo sa kanal. Suno kay Toledo, alas-2 kaina sang kaagahon sang nakabati siya sang mga lupok sang pusil pero wala man ginsapak.

Ginpahayag sang SOCO nga may pilas sang pagkatiro ang biktima sa wala nga abaga kag likod. Naburambudan man sang packing tape ang iya guya kag may higut nga packing tape ang magtimbang nga kamot.

‘Tokhang Surrenderer’

Ginkonfirmar naman ni PCINSP Marlon Valencia, hepe sang Molo Police Station, nga tokhang surrenderer si Bahande. Sa pag-usisa sang SOCO, may nakita nga 11 ka sachet sang suspected shabu sa bulsa sang shorts sang biktima.

Daw sa indi mabaton sang iloy ni Bahande ang natabu. Suno kay Rhodora Bahande, katapusan niya nakita ang biktima kagab-i. Si Joseph lang suno sa iloy ang ginasaligan niya sa ila pagpangabuhi. Ginpabutyag man sang iloy nga mabuot kag wala sang bisyo ang iya bata. (AGB)

Leave a Reply