Construction sang 85-million pesos nga Drainage System sa syudad, suguran na sang DPWH
Iloilo City–Suguran sang Department of Public Works and Highways ang construction sang Drainage System sa syudad nga nagabalor sang 85 milyones pesos antes magtapos ang subong nga bulan.
Ini ang ginkonfirmar ni DPWH City District Engineer Rodney Gustilo kasunod sang pagpahibalo sa city government. Suno kay Gustilo, kabahin ang proyekto sang comprehensive drainage plan sang ahensya agud mapahagan-hagan ang problema sang pagbaha sa syudad.
Sakup sang proyekto ang dalan Valeria, Fuentes, Quezon kag Mabini, City Proper.
Gin-athag ni Gustilo nga bilog nga tuig ang implementasyon sang proyekto gani magapadayon ang pag-obra bisan naga-ulan na.
Nagpakig-angut si Gustilo sa city government para sa pagsugod sang pag-obra sang drainage system agud makapaminsar sang temprano nga solusyon ang syudad sa posible mahatag nga huol sang proyekto. (AGB)