Signages sa ginapatuman nga Speed Limit Ordinance, ginrekomendar nga padakuan kag himuon nga reflectorized

Iloilo City–Ginrekomendar ni Councilor Joshua Alim nga padakuan kag himuon reflectorized ang mga signages nga ipamutang sa mga dalanon sang siyudad may kaangtanan sa ginapatuman nga Speed Limit Ordinance.

Ginpahayag ni Alim nga bukas man ang Traffic Oversight Committee sa iya rekomendasyon. Nakita suno sa iya base sa ila obserbasyon halin sang ginpatuman ang ordinansa nga madamo ang wala nakahibalo.

Aminado man si Alim kag iban pa nga miembro sang oversight committee nga wala nagaserbe sang katuyuan sini ang mga tarpaulin nga ginpamutang malapit sa infante flyover kag sa baylo, magabutang pa ini sa peligro sa kabuhi sang mga motorista. Isa man sa mga concerns suno kay Alim ang pagbutang sang fast kag slow lanes.

Posible suno kay Alim nga sa Diversion Road sa Mandurriao, himuon nga fast lane ang duha ka lanes sa wala kag slow lanes naman ang duha ka lanes sa tuo. Sa Hunyo 19 suno kay Alim, mahimo mahibaluan ang mga amendments sa Speed Limit Ordinance. (AGB)