Ilonggo sang Phil. Marines, nalakip sa mga napatay sa kinagamo sa Marawi City; Isa pa ka Ilonggo nga suldado, pilason man sa pag-atake sang Maute
Iloilo — Nagahilibion ang amay ni Sgt. Simeon Plares Jr sang Barangay Ubang, Pototan sang nahibaluan ang pagkamatay sang iya bata sa engkuwentro batuk sa Maute group members sa Marawi City. Suno kay Simeon Emoy Plares, indi pa siya magpati sang gintundaan siya sang nobya sang iya bata angut sa natabu. Apang nabaton man niya sa ulihi nga isa sa mga casualties ang iya bata. Si Sgt. Plares ang bugtong nga lalaki sa apat ka kabataan sang mag-asawa nga Simeon Emoy Plares kag Violeta Ilisan Plares. Si Sgt. Plares ang kabahin sang Marine Battalion Landing Teams nga nagahimo sang house-to-house search sa Brgy. Lilod Madaya sang gin-atake sang mga local nga terorista. Nalakip ini sa 13 ka mga marines nga napatay sa engkuwentro sang Hunyo 9 sang gab-i.
“Sgt. Joe Lebuna”
Nalakip naman sa 40 ka mga napilasan nga suldado sa engkuwentro sang goverment troops kag maute group members ang ilonggo nga suldado nga tumandok sang Brgy. Bagongbong, Lambunao. Padayon nga ginabulong sa ospital sa Iligan City si Sgt. Joe Lebuna nga miembro sang Marine Battalion Landing Team 7 sa Marawi City.
Suno sa iya utod nga si Wilfred Lebuna, wala siya nakabalo kun sa diin ang mga pilas sang utod apang segurado nga maayo na ang iya kondisyon. Handum ni Sgt. Lebuna halin sang una nga mangin soldado suno kay Wilfred. (JoMaque)