NPA NANGINWALA NGA SILA ANG NAGATAGO KAY PDEA-IDENTIFIED DRUG GROUP LEADER RICHARD PREVENDIDO

Province of Iloilo – Daku nga kabutigan ang impormasyon nga New People’s Army ang nagaproteher kay PDEA 6 identified drug group leader Richard Prevendido alyas buang.

Sa press statement nga ginpaguwa sang Coronacion Chiva “waling-waling” command-NPA Panay kahapon, ginpabutyag sang spokesman nga si Julio Montana nga propaganda ang ginpaguwa nga impormasyon batuk sa ila kag pagtabon sang kapaslawan sang mga otoridad nga matapos ang illegal nga druga.

Ginpahayag ni Montana nga ginakondenar sang NPA ang ila gintawag nga pato-pato kag malisyoso nga istorya nga miembro nila ang nagatago kay Prevendido gani wala gihapon nadakpan.

Ginpanindugan sang NPA nga nagakontra sila sa illegal drugs kag nagahimo sang mga aksyon agud batuan ini. Nagapati ang NPA nga madugay na kuntani nadakpan si Prevendido kon wala sang kahimbon nga mga mataas nga opisyal sang AFP, PNP, PDEA kag mga kurap nga pulitiko.

Una na ginpanugyanan ni PDEA 6 Assistant Regional Director Levi Ortiz ang NPA nga i-check ang ila hanay kasunod sang impormasyon nga miembro nila ang nagatago kay Prevendido.

(ATT)