Maasin Police Station, gin-atake sang NPA

Maasin, Iloilo — Ginsulod sang indi magnubo sa 50 ka mga miembro sang New People’s Army ang Maasin Police Station kahapon sang aga. Suno kay Police Regional Office 6 Chief Supt. Cesar Hawthorne Binag, gindis-armahan sang mga rebelde ang 9 ka mga pulis nga naka-duty, ginpahapa kag ginposasan. Ginkuha man sang mga NPA ang 4 ka glock 9mm service pistol, 11 ka M16 rifles, 4 ka cellphones, duha ka laptops kag 5 ka hand-held radios. Gintaban man sang mga rebelde ang back-to-back hilux patrol nga may base radio communication. Ginkuha man ang mga alahas kag P29,000 nga cash sang pulis nga naka-duty. May ginbilin man nga sulat ang NPA kag antes nagpalagyo, nagpalupok sang makaisa ka bes ang mga rebelde kag nagsinggitan nga “Mabuhay ang mamamayang Pilipino” kag “Mabuhay ang New People’s Army”. Narecover sa Barangay Cagay, Alimodian ang patrol car sang Maasin Police Station samtang ang getaway vehicle nga ginsakyan sang mga rebelde ang narecover naman sa Brgy. Pajo, Alimodian. (JoMaque)