SSUPT Marlon Tayaba, nagpungko na bilang acting director sang IPPO

Sta. Barbara, Iloilo — Nagsugod na pangalagad ang acting director sang Iloilo Police Provincial Office nga si Senior Supt. Marlon Tayaba. Ginkonfirmar ni Tayaba nga gin-aprubahan ang iya assignment sang Hunyo 19 kag nag-abot siya sa provincial headquarters sa Sta Barbara kahapon sang aga. Si Tayaba ang anay director sang Criminal Investigation and Detection Group ukon CIDG 6 antes gin-assign sa ARMM kag isa man sa mga nagapamuno sa clearing operations sa marawi city nga ginsalakay sang Maute group. Ginbuslan ni Tayaba si Senior Supt. Harold Tuzon nga naiguan sang one-strike policy sang PNP kasunod sang pagsulong sang New Peoples Army sa Maasin Police Station sang domingo (Hunyo 18).

‘Marching Orders’

Tutukan sang bag-o nga acting director sang IPPO ang pagpakig-away batuk sa mga grupo nga pamahug sa seguridad sang probinsya.         Suno kay Senior Supt Tayaba, mangin operation-oriented ang iya pagpamuno kag posible gamiton niya ang iya natun-an samtang nagapakig-away sa Maute group sa Marawi City. Kahapon lang nagsugod pungko si Tayaba bisan Hunyo 19 pa na-aprubahan ang iya assignment bangud nga nagapakig-away pa siya sa Marawi.

Ginpahayag ni Tayaba nga magluwas sa mas agresibo nga operasyon batuk sa insurgency, ipatuman niya man ang mas hugot nga pagpakig-away kontra illegal drugs kag mga lawless elements.

Ginpasiguro man ni Tayaba nga secured ang mga pumuluyo sa probinsya. Ini sa pihak sang pag-atake sang NPA sa Maasin Police Station kag engkwentro sa tunga sang Alsa Masa kag mga katapu sang 61^st Infantry Battalion batuk sa armado nga grupo sa Lampaya, Leon. Suno kay Tayaba, naka-alerto ang bilog nga pwersa sang IPPO kag mga municipal police stations agud masiguro nga indi makalusot ang mga malain nga elemento. Ginpasalig ni Tayaba nga mangin aktibo ang mga pulis sa iya pagpamuno. (JoMaque)