Tatlo pilason sa stabbing kag hacking incidents sa San Miguel

San Miguel, Iloilo — Gindala sa Western Visayas Medical Center ang mag-iloy nga ginpahayag ginbuno kag ginlabu sang ginpahayag hubog nga suspetsado sa Brgy. San Jose, San Miguel. Gindala man sa Medical City ang suspetsado matapos ginbalusan labu sang himata sang mga biktima.  Suno kay PO3 Glenn Gasapo, imbestigador sa San Miguel Police Station, nag-ugat ang insidente sang naghulam ang himata sang mag-iloy nga biktima nga sanday Lalaine Buensuceso, 47-anyos , kag Prince Russel Buensuceso, 19-anyos, sang DVD player sa asawa sang suspek nga si Gil Marin, 37-anyos kag residente sang nasambit nga barangay.  Apang wala ginpahulam sang asawa ni Marin ang himata sang mga biktima. Nakabati naman sang chismis ang suspek nga ginhambalan sang mga Buensuceso ang iya asawa nga suplada rasun iya ginkomprontar tubtub nga nagbaisay kag nagpanghangkat ini sang inaway.  Una nga nagkuha sang kutsilyo ang suspek kag ginbuno ang babaye nga biktima. Nagpatunga ang bata ni Lalaine nga si Prince apang nalabuan man siya sa ulo kag wala nga butkon.  Gilayon naman nga nagbalos si Efren kag nagkuha sang binangon kag ginlabu ang suspetsado sa ulo.  Padayon nga ginabulong sa separado nga ospital ang mag-iloy kag ang naglabu sa ila nga si Marin. Preso man sa San Miguel Police Station si Efren nga nagbalos labu kay Marin. (JoMaque)