Maestra sa Ajuy, nag-athag nga indi hungod nga naigo sang stick ang agtang sang 7 ka tuig nga estudyante
Iloilo — Indi intention sang grade 2 teacher sa pili elementary school sa Pili, Ajuy nga sakiton ang iya estudyante nga nasisi ang agtang sang naigo sang iya stick sang nagligad nga Martes sang hapon. Pa-athag ini ni Herna Gonzales matapos naglupok ang balita sang ginpost sang iloy ni alyas Nonoy nga si alyas Mia sa facebook ang mga litrato sang bata nga may pilas sa agtang. Suno kay Gonzales, sawayon niya kuntani ang estudyante nga nagahampang sang gunting kag papel pero si Nonoy ang naigo sang bamboo stick. Ginpahayag sang maestra nga naka-istoryahanay sila sang iloy ni Nonoy kag ginhagatan niya sang inugpabulong sa bata gani nagdumdom siya nga na-settle na nila ang problema.
Na-istorya man sang principal nga si Lina Valeriano si Gonzales kag ginsugid suno sa iya sang maestra nga indi niya hungod nga iguon sang stick si Nonoy. Ginkonfirmar ni Valeriano nga pagkatapos sang natabu, ginpapahuway si Nonoy sa principal’s office kag ginpatawag ang iya iloy antes siya gindala sa ospital. (JoMaque)