Scout Ranger nga tumandok sang Antique, napatay sa nagapadayon nga inaway sa Marawi City

Napatay sa nagapadayon nga inaway sa Marawi City ang scout ranger nga tumandok sang Barangay Camansijan, Culasi, Antique.

Naigo sang sniper sang Maute group ang 28-anyos nga nga si Private First Class Cris Lorenzo. Si Lorenzo ang nalakip sa malaba nga listahan sang mga tropa sang gobyerno nga nagsakripisyo sang ila kabuhi sa kinagamo sa Marawi.

Suno sa amay sang soldado nga si Emilio, isa pa lang ka semana nga nagbalik sa Mindanao ang iya anak matapos nagbakasyon sa ila lugar. Kahapon, nabaton nila ang impormasyon nga napatay si Lorenzo.

Si PFC Lorenzo nga ikasiyam sa 11 ka mag-ulutod, nagabulig sa pagpa-eskwela sa iya mga manghod kag nagasuporta sa kinahanglanon sang iya ginikanan.

Sa handum nga makaserbisyo sa pungsod pareho sang iya magulang, nagsulod man sa pagkasuldado si PFC Lorenzo. (AGB)