Mag-amay sa Lemery, naanod sa baha; amay nasapwan nga patay, isa sa duha ka bata, missing
Lemery, Iloilo–Patay ang amay kag missing ang 14-anyos niya nga bata nga lalaki sang naanod sang baha ang ila payag sa Sitio Libongcogon, Brgy. Layogbato, Lemery kagab-i.
Suno kay PO1 Mark Anthony Adelino sang Lemery Police Station, mabaskog ang ulan kagab-i nga nagresulta sang pagbaha gani naanod ang payag nga gina-istaran sang pamilya Ortega. Naanod ang mag-amay nga Ricky, 45-anyos kag duha sini ka bata nga lalaki nga naga-edad sang 14 kag 11 anyos.
Nasapwan kaina sang aga nga nagalutaw sa suba ang bangkay ni Ricky samtang missing ang 14-anyos sini nga bata nga lalaki.
Nakaluwas naman ang 11-anyos nga bata nga nakahawid sa balagon kag padayon nga ginabulong sa ospital. (AGB)