NPA, nagpaguwa sang panibag-o nga statement kasunod sang pagsalakay sa Maasin Police Station

Iloilo — Nagpaguwa sang panibag-o nga statement ang New Peoples Army may kaangtanan sa pag-atake sa Maasin Police station.  Sa facebook post sang Coronacio Chiva Waling-Waling Command NPA-Panay paagi sa ila tagpamaba nga si ka Julio Montana, gin-akusaran sang NPA ang police regional office 6 nga nag-ulamid sang inosente nga mga sibilyan sa mga ginkasuhan. Suno sa NPA, nagamit ang PNP sang dirty trick kag nag-akusar sa mga ginadudahan nila bisan wala sang basehan.

Gindala pa suno sa NPA sa ginkasuhan ang bata ni National Democratic Front of the Philippines Peace Consultant Concha Araneta Bocala kag may mga pamilya man nga nagreklamo bangud nadala sa ginpasakaan sang kaso ang ila himata. Ginpahayag ni ka Julio nga gin-usisa nila ang listahan sang mga ginpasakaan sang kaso kag pila sa ila ang indi kilala sang hublag.

Sang damlag lang, nagpadulong sa alimodian Police Station ang duha sa 60 ka ginkasuhan sang police sa pag-atake sa Maasin Police Station nga sanday Joerey Cordero kag John Rey Aguado. Gin-updan sila sang ila ginikanan kag maestra agud tinluan ang ila pangalan nga wala sang kahilabtanan sa NPA. Suno kay Senior Inspector Ramon Coriana sang Alimodian Police station, lunsay mga estudyante sang Gines National High School sanday Cordero kag Aguado. (JoMaque)