(UPDATE) Suspek sa pagbuno patay sa tigulang sa Tigbauan, nanginwala sa akusasyon!
Tigbauan, Iloilo–Nadakpan ang suspek sa pagbuno patay sa tigulang sa Barangay Parara Sur, Tigbauan kahapon sang kaagahon.
Ginkilala ang suspek kay Ronilo Camiña Jr sang Barangay Bulad, Guimbal nga nadakpan sa hot pursuit operation kaina sang hapon. Ginpanginwala ni Camiña nga siya ang nagbuno patay kay Baldomera Duga, 63-anyos. Suno diri, nagakatulog siya sa ila balay sa Barangay Bulad sang Sabado sang gab-i gani nakibot siya sang gindakup kaina. May bagras man sa tiil si camiña pero ginrason sini nga nasamaran siya sa paghampang sang basketball kahapon.
‘100% sure’
Positibo naman si Mary Joy Cabuguas, 24-anyos nga bata ni Duga, nga si Camiña ang nagsulod sa ila balay kahapon sang kaagahon.
Suno kay Mary Joy, nakita niya ang hitsura ni Camiña sang nakakas ang tabon sa iya guya samtang nagapukutay sila. May pilas man sa tuhod kag siko si Mary Joy kasunod sang natabu.
Ginapreparar na ang mga kaso nga robbery with homicide kag physical injury nga ipasaka batuk kay Camiña. (AGB)