Mga miembro sang Task Force Crusader nga nagraid sa balay sa Guimaras, papanaugan sang disciplinary action sang ila national commander

Papanaugan sang disciplinary action ni Ret. General Romeo Maganto, National Commander sang Task Force Crusader, ang 12 ka miembro sang task force nga nag-raid sa balay sa Jordan, Guimaras kagab-i.

Suno kay Maganto, wala niya gina-tolerate ang ginhimo sang grupo ni Ian Paclibar, ang Regional Commander sang Task Force Crusader. Ma-athag suno sa iya sa ila pagsulundan nga indi puwede magpanguna sa pag-raid ang task force. Ginpahibalo si Maganto nga wala nag-coordinate sa Guimaras Police Provincial Office ukon sa Jordan police station ang mga miembro sang task force.

Una na ginpabutyag ni PCINSP Shiela Marie Sardoma, hepe sang Jordan Police Station, nga ginraid sang grupo ang balay ni Ferdinand Ronsales sa Poblacion, Jordan nga wala sang search warrant. agpakilala ang mga ini nga pulis pero wala sila naka-uniform.

Gin-hold sang Jordan police ang 12 ka miembro sang Task Force nga sanday Alfredo Ticar, Nelwin Tilleran, Loreto Rendon, Angel Allado jr, Jose Geraldo Ausin, Larry Agrabio, Refrain Flor, Juanito Magbanua, Rommel Bañola, Eldy Flores, Rodolfo Andrade kag Ian Paclibar. Narecover ang duha ka 9mm pistol, lima ka 45 caliber pistol, isa ka 357 revolver, kag 38 caliber revolver. (AGB)