27-anyos nga lalaki nga tatlo ka adlaw nga ginapangita sang iya pamilya, nasapwan nga patay sa Jaro

Iloilo City–Patay na sang nasapwan ang 27-anyos nga lalaki nga tatlo ka adlaw na ginapangita sang iya pamilya.

Nakita ang bangkay sang lalaki nga nagahuray-ad sa bakante nga lote sa kilid sang apat ka panalgan nga building sa Jalandoni, Jaro kag ginapatihan nga naglumpat halin sa rooftop. Una nga nakita ang pares sang tsinelas sa rooftop sang building kag ginkonfirmar sang pamilya nga ginapanag-iyahan sang napatay.

Nagpangabay ang pamilya sang nasapwan nga indi na pag-ibuyagyag ang iya identity. Natalana naman nga ipa-autopsy ang bangkay sang lalaki. (AGB)