PECO, nagsuhestyun nga amiendahan ang Meter Reading Card Ordinance ni Councilor Joshua Alim

Iloilo City — Ginsuhestyun sang Panay Electric Company ukon PECO kay Mayor Jed Patrick Mabilog nga amiendahan ang Meter Reading Card Ordinance nga gin-author ni Councilor Joshua Alim. Sa pagpakigsapol sang PECO sa alkalde sang Lunes, ila ginhingyo nga sa baylo meter reading card ang ipadala sa mga konsumedor, picture na lang sang kuntador sang mga konsumedor ang ipadala sa email ukon sa web portal sang PECO. Katuyuan sini nga indi ma-delay ang ila meter reading schedule. Suno kay PECO Corporate Communications Officer Mikel Afzelius, mas feasible ang ila suhestyun kag mas daku ang chansa nga maaprobahan sang city council.  Ginpahibalo ni Afzelius nga nagpabor si Mabilog sa ila suhestyun. Halos tanan suno sa iya bisan sa class C kag D levels ang may Facebook account gani may access sa internet bisan sa cellphone lang. Igapresentar man sang PECO sa barangay level ang ila suhestyun agud maka-coordinate sa mga barangay kapitan ang mga konsumedor nga indi maka-access sang ila meter picture online.

“Palagpat”

Gintawag ni Councilor Joshua Alim nga palagpat ang suhestyun sang PECO nga picture na lang sang kuntador sang mga konsumedor ang ila ipadala sa email ukon web portal sa baylo nga meter reading card.   Suno kay Alim, mabudlay kuhaan sang litrato ang mga kuntador nga tuman kataas kag naga-ikit ikit sa isa ka poste.  bisan ang PECO suno sa iya ang wala man nakahibalo kun diin ang kontador sang isa ka konsumidor.  Mangin wala na sang pulos suno sa iya ang ordinance kun sundon ang suhestyun sang PECO bangud maathag nga nasaad sa ordinansa nga obligasyon sang PECO nga maghatag sang meter reading card sa mga konsumedor.  Magluwas sini, madula ang katuyuan sang ordinansa nga maproteheran ang mga konsumedor sa erroneous billing sang PECO. (JoMaque)