Pickup nga ginlagas sang Highway Patrol Group, naaksidente sa Jaro; driver sang pickup, patay!

 Iloilo City–Patay ang driver sang mitsubishi strada nga ginlagas sang Highway Patrol Group matapos naaksidente sa Balabago, Jaro kaina sang hapon.

Ginkilala ang napatay kay Angelico Ferrer, 50-anyos sang Lopez Jaena, Molo samtang padayon nga ginabulong sa WVSU Medical Center ang iya kaupod nga si Mary Joy Garcia, 26-anyos sang Boulevard, Molo. Suno kay PCI Herbert Ballego, hepe sang Zarraga Police Station, pauli na sila halin sa syudad sang nasumalang ang pickup kag nakita gid sang nadisgrasya ang salakyan. Ginbuligan sang grupo ni Ballego maluwas ang babaye kag madala sa ospital samtang nabudlayan pa ang pagkuha sang taga-Bureau of Fire Protection sa lalaki bangud nagupi gid ang pickup.

Suno naman kay Tanod Ernesto Dela Cruz sang Balabago, nakabati siya sang mga lupok kag wangwang gani naguwa sa highway. Nakita na lang sini nga nahulog na ang pickup sa unhan sang taytay.

‘May violation’

Nagamit sang plate number nga halin sa ginkawat nga salakyan sa Makati ang Mitsubishi Strada nga ginamaneho ni Ferrer suno kay PSINSP Jaime Cadoy sang HPG. Suno kay Cadoy, nagaconduct sang vehicle spotting sa Lapaz Plaza ang iya mga tinawo sang nasiplatan ang pickup nga nagamit sang improvised plate number.  Ginpadulog suno kay Cadoy ang salakyan pero nagdiretso.

Ginpabutyag man ni Cadoy nga wala sila nakapalupok sang pusil, baliskad sa nauna na nga statement ni PO2 Bryan Estandian nga nagserbe siya nga blocking force sa Balabago. Gin-ako ni Estandian nga gintiro niya ang goma sang pickup agud magdulog apang nagdiretso gihapon tubtob na-aksidente. (AGB)