Negosyante sa Passi City, patay sang ginpahayag aksidente nga natiruhan ang kaugalingon

Passi  City — Patay ang 34-anyos nga negosyante matapos ginpahayag natiruhan ang kaugalingon sa Passi City kaina sang kaagahun. Suno kay Police Chief Inspector Gervenson Moyo, hepe sang Passi City Police Station, nakabati ang iloy sang lalaki nga si alyas John nga may naglupok sa iya kwarto alas tres kaina sang kaagahun. Nasapwan na lang nga dugu-on si John sa sulod sang comfort room sa iya kwarto suno kay Moyo kag may pilas sa wala nga pisngi. Base sa report sang Passi City Police, naglapus ang bala sang caliber .22 revolver sa ulo ni John. Suno kay Moyo, naka-inom ang lalaki kag may problema sa iya girlfriend antes natabo ang insidente base sa panaysayun sang iya utod. Padayon pa ang imbestigasyon sang Passi City police kun ano ang kawsa sang insidente apang isa sa mga ginalantaw nga anggulo amu ang pagpanginmatay suno kay Moyo. (JoMaque)