Operasyon sang illegal gambling nga bookies, nagbalik sa pila ka banwa sa probinsya suno sa IPPO director

Iloilo–Nagbalik ang operasyon sang illegal gambling nga bookies sa mga banwa sa probinsya base sa monitoring sang mga pulis. Pahayag ini ni IPPO Director PSSUPT Marlon Tayaba sang ginpatawag sa Sangguniang Panlalawigan kahapon.

Suno kay Tayaba, lima ka banwa lang ang wala na sang operasyon sang illegal gambling base sa certification nga ginhatag sa ila sang Eagle Crest, ang operator sang Small Town Lottery sa probinsya. Gintumod ni Tayaba nga gambling free ang Dingle, Ajuy, Zarraga, Sta. Barbara kag Pototan. Samtang nagbalik suno sa iya ang illegal gambling sa Lambunao, Passi City, Barotac Nuevo, Banate, Dumangas, Balasan kag Estancia.

Ginpahayag ni Tayaba nga base sa imporasyon nga nakalab-ut sa ila, may muslim nga financier sang illegal gambling sa probinsya. (AGB)