Estancia Mayor Rene Cordero, bukas nga i-lifestyle check

Iloilo — Bukas si Estancia Mayor Rene Cordero nga i-lifestyle check. Pahayag ini sang alkalde matapos ginkumpirmar ni NBI 6 Director Atty. Max Salvador nga lakip siya sa i-lifestyle check base sa mandu ni Presidente Rodrigo Duterte. Ginpaathag ni Cordero nga ginhulaman sang iya pamilya ang P15-million sa bangko ang ginpatindog sa ila hotel sa banwa. May mga propedad man suno sa iya nga ginapapanubli sang iya ginikanan. Suno pa kay Cordero, may ginabaton man ang iya asawa halin sa America kada bulan. Wala namitlangan ni Presidente Duterte si Cordero nga drug protector pero ginpahayag ni Atty. Salvador nga nalakip siya sa listahan sang ipa-lifestyle check.

“Pulitika”

Pulitika ang ginapanan-aw nga motibo ni Cordero kon ngaa nalakip siya sa ginpa-lifestyle check sang NBI 6. Suno kay Cordero, madamu man siya sang kaaway sa pulitika nga luyag magpungko kon mapahalin siya ukon masuspender. Ginpabutyag sang alkalde nga wala sang padaug ang iya mga kontra kon eleksyon lang ang saligan. Ginapanindugan ni Cordero nga wala siya sang ginaproteksyunan nga involved sa illegal drugs kag wala gid sang tiun nga nangin drug protector siya. Dugang niya, ginasuportahan niya man ang mga pulis sa kampanya kontra illegal nga druga. (JoMaque)