Mga police nga nagabantay sa Smallville Complex, gindugangan kasunod sang serye sang inaway nga ginadalahigan sang mga menor de edad

Iloilo City — Gindugangan ang deployment sang mga pulis sa Smallville Complex, Boardwalk kag Atria area sa San Rafael Mandurriao. Kasunod ini sang mga inaway nga ginadalahigan sang mga menor-de-edad nga kalabanan ang ginadudahan mga miembro sang gang.  Suno kay Iloilo City Police Office Director Henry Biñas, dugangan pa gid ang deployment matapos ang rambol sang mga pamatan-on kag construction workers sa atubang sang SM City sang Domingo sang gab-i. Ginapa-imbestigaran ni Biñas kon sin-o ang mga pamatan-on nga involved sa mga inaway.

Pito ka pulis ang gindugang ni Biñas nga magbantay sa ginakabig nga night life hub sang syudad magluwas pa sa gin-assign sang Mandurriao Police Station kag nagalibot nga mga miembro sang Iloilo City Public Safety Company.

Sa record sang Aksyon Radyo Iloilo halin Hulyo tubtob Setyembre 24 sang gab-i, nagalab-ut na sa 18 ang kaso sang mga inaway nga ginadalahigan sang mga menor-de-edad sa San Rafael, Mandurriao. (JoMaque)