Punong barangay sang Zerrudo Sara, gintudlo nga nagpahulam sang pusil sa mga nag-abduct sa 22-anyos nga dalaga sa Ajuy suno sa IPPO

Iloilo — Ginpahulam sang punong barangay sang Zerrudo, Sara sang pusil ang abductors sang 22-anyos nga babaye sa Central, Ajuy base sa impormasyon nga nakalab-ut sa Iloilo Police Provincial Office.  Ini ang rason suno kay IPPO Director Marlon Tayaba nga nag-apply sila sang search warrant kag gin-operate si Punong Barangay Manuel Agutaya kahapon.  Ginpamunuan ni Chief Inspector Charlie Sustento, hepe sang Ajuy Police Station kag supervisor sang Provincial Drug Enforcement Unit Team 3, ang operasyon. Nakita sa balay ni Agutaya ang 9mm pistol, mga bala kag magazine sang 9mm kag tatlo ka magazine sang m16 rifle. Gina-claim ni Agutaya nga may lisensya ang 9mm samtang nadula naman ang iya m16 rifle sang naglaslas ang Bagyo Yolanda sang 2013. Makatingalahan lang suno kay Tayaba kon ngaa subong nga Setyembre lang ginpa-blotter sang kapitan nga nadula ang iya m16. Sa panaysayon sang ginikanan kag utod ni alyas Ira, naka-uribay sang m16 kag uzi ang duha ka abductors nga nagsulod sa ila balay kag nagkuha sa dalaga sang Setyembre 18 sang gab-i. (JoMaque)