1 patay, 3 pilason sa tiruhay sa quarry site sa Dueñas!

Dueñas, Iloilo–Isa ang patay, tatlo ang padayon nga ginabulong sa ospital sa pagtiruhay sang duha ka grupo sa quarry site sa Barangay Dila-an, Dueñas pasado alas-11 kaina sang aga.

Napatay sa Calinog District Hospital si Romer Perez sang Capuling, Dueñas, nga may pilas sa dughan. Ginabulong naman sa Western Visayas Medical Center sanday Jennifer Labon, 44-anyos nga caretaker sang quarry site nga may pilas sa tiyan, kag Romy Velasco, 46-anyos nga may pilas sa kamot kag leog. Lunsay mga residente sang Cabudian, Dueñas sanday Labon kag Velasco. Ginabulong man sa ospital si Ramil Ramirez sang Janiuay.

Sa pag-interview ni Cabudian Punong Barangay Joel Jayson, ginsulong sang napatay nga si Perez kag sang kaupod sini nga si Ramirez sanday Velasco kag Labon kag nagsuay sa right of way sa quarry site. (AGB)