New People’s Army, nag-ako nga sila ang responsable sa pag-ambush kag pagpalupok sang IED sa mga katapu sang 61st IB sang Philippine Army sa Janiuay

Iloilo — Gin-ako sang New People’s Army nga ang ila yunit nga Jose Percival Estocada Command ukon JPEC ang nag-ambush sa tropa sang 61st Infantry Battalion sang Philippine Army sa Brgy. Pangilihan, Janiuay kagab-e. Suno kay Ka Julio Montana, tagpamaba sang Coronacion “Walingwaling” Chiva Command sang NPA-Panay, ginpalukpan sang JPEC sang command-detonated explosive ang salakyan sang mga soldado. Dugang niya, wala sang may napilasan sa bahin sang NPA. Ginpabutyag ni Ka Julio nga masobra sa tatlo ka semana na ang combat operation sang 61st IB sa kabukiran sang Janiuay nga nagresulta sa kakulba sa mga mangunguma. Kilala ang gin-atake nga yunit sang mga soldado suno kay Ka Julio sa pagpamahog, pagpang-hostage kag pagpaniro sa mga sibilyan kag ginapasibangud naman sa NPA.  (JoMaque)