4 nalumos sa busay sa Igbaras, isa napatay

Igbaras, Iloilo — Napatay sang gindala sa ospital ang 30-anyos nga lalaki matapos nalumos sa Nadsadjan Falls sa Brgy. Passi, Igbaras. Suno kay Inspector Oman Bryndell Estabillo, hepe sang Igbaras Police Station, ginkilala ang napatay kay Julie Delgado Magbanua sang Brgy. Jalaud Norte, Zarraga. Apat ang nalumos suno kay Inspector Estabillo lakip ang napatay. Base sa imbestigasyon sang Igbaras police, naglagaw ang 10 ka magbarkada sa nasambit nga busay matapos nakita sa Facebook ang lugar apang nagdiretso sila sa busay kag wala nakig-angut sa Tourism Office sang banwa. Ginpahayag nagapapicture sa tunga sang busay ang mga nalumos sang hinali lang nagtaas ang lebel kag nagbaskog ang daludo sang tubig. Nakita ang lawas ni Magbanua sa Brgy. Pinaopawan, ginabanta anum ka kilometro ang kalayuon sa Brgy. Passi. Estable na ang kondisyon sang iban pa nga mga nalumos. (JoMaque)