Councilor Jeffrey Ganzon, nanginwala nga siya ang nagaduhol sang sala nga impormasyon parte kay Mayor Jed Patrick Mabilog kay Presidente Rodrigo Duterte

Iloilo City–Nagdepensa si Councilor Jeffrey Ganzon sa mga akusasyon batuk sa iya ni Mrs. Marivic Mabilog, asawa ni Mayor Jed Patrick Mabilog kag columnist Alex Vidal nga siya ang nagaduhol sang sala nga impormasyon kay Presidente Rodrigo Duterte agud pakalainon ang alkalde kag ang syudad sang Iloilo.

Suno kay Ganzon, antes pa man siya nagpakigkita kay Duterte sang Marso 27, ginpa-andaman na siya nga indi pagmitlangon sa ila pag-istoryahanay ang pangalan nanday Mabilog kag Senator Franklin Drilon. Nagalain suno sa iya ang modo sang presidente kun mamitlangan ang pangalan sang alkalde kag senador.

Gin-athag ni Ganzon nga wala na siya sang dapat nga iduhol nga sugilanon kay Duterte angut kay Mabilog bangud kumbinsido na ini nga may koneksyon sa illegal nga druga ang alkalde.

Nagdepensa si Ganzon paagi sa sulat para kanday Mrs. Mabilog kag Vidal kasunod sang Facebook post ni Mrs. Mabilog kag ginpublish nga article sang kolumnista sa The Daily Guardian nga nagatawag nga ‘Hudas’ ang konsehal. (AGB)