Suspect sa pagmartilyo sa mag-asawa nga Muslim kag ila 5 ka bulan nga bata, naggamit sang lain nga ngalan

Iloilo City — Nadiskubrehan sang Mandurriao police nga naggamit sang lain nga ngalan ang suspect sa pagmartilyo sa mag-asawa kag ila lima ka bulan nga bata nga lalaki sa Mandurriao Plaza. Suno kay Chief Inspector Juvy Navales, hepe sang Mandurriao Police Station , nakig-angut sila sa Himamaylan Police kag nabal-an nga may Mark Ganava nga pumuluyo sang Sitio Lumboy, Brgy. Mambagaton, Himamaylan, Negros Occidental apang didto man ang natumod nga lalaki sa lugar. Una na nagpakilala ang suspect nga siya si Mark Ganava. Ginapangayuan sang birth certificate si Mark Ganava sa Himamaylan agud mapamatud-an nga siya gid man ang natungdan. Natukiban sang Mandurriao police nga si JR Mojana ang matuod nga ngalan sang suspetsado kag tumandok man sang Himamaylan, Negros Occidental.  Si Mojana ang positibo nga gintudlo sang mga testigo nga nagmartilyo sa mag-asawa nga sanday Asniefa kag Muamar Ditingki kag ila 5 ka bulan nga lapsag nga lalaki. Napatay ang mag-amay samtang padayon nga ginabulong sa ospital si Asniefa. 

Suno kay Navales, ginsulod ni Mojana ang ginatineran nga kiosko sang mga biktima kag gin-martilyo. Ginpahayag nga naakig siya bangud ginsit-sitan siya sang biktima. Nadakpan si Mojana sa follow up operation sang Mandurriao police kag gin-ako ang krimen. Magapangatubang sang kaso nga double murder, frustrated murder kag concealing of true name bangud sa paggamit sang pangalan sang lain nga tawo. (JoMaque)