Mag-utod nga lalaki sa Barotac Viejo, papuwersa nga ginkuha sang 3 ka armado nga lalaki sa ila balay

Barotac Viejo, Iloilo — Papwersa nga ginkuha ang mag-utod nga lalaki sa Barangay San Lucas, Barotac Viejo pasado alas-4 kahapon sang hapon.  Suno kay alyas Inday, 43-anyos nga iloy sang ginkuha nga sanday alyas Noynoy, 20-anyos, kag alyas John-John, 15-anyos, naga-ihaw siya sang manok sang nagsulod ang tatlo ka armado nga lalaki nga may tabon sa guya, gintayaan sila sang pusil kag ginpang-ukay ang mga gamit sa sulod. Ginpamangkot man si Inday kon diin ang iya bana nga si alyas Nonoy. Kaupod ni Inday sa sulod sang balay ang iya duha ka bata, ang iya iloy kag ang anum ka tuig nga babaye nga bata sang iya pakaduha. Nakaguwa kag nakapangayo sang bulig si Inday sa mga barangay officials sa ubos sang ila balay matapos nga ginrason niya nga makuha siya sang balunggay.

Nagpangayo naman sang bulig sa Barotac Viejo police si Punong Barangay Eddie Lumampao pero wala nakapalagyo na ang mga suspek upod sa duha ka bata sang nagbalik sila sa balay. Nagapati si Kapitan Lumampao nga masobra tatlo ang suspek bangud may nakita sila nga mga ginhukmungan sa likod sang balay. Ginlighut sang mga barangay officials upod sa mga pulis sang Barotac Viejo kag kaingud nga mga banwa ang kampo sa palibot sang balay pero wala gid nakita ang mga suspek kag duha ka bata.

Nakapauli na

Nagmato-mato kadto sa Barotac Viejo Municipal Police Station alas tres subong nga kaagahon ang mag-utod nga ginpahayag papwersa nga ginkuha sang armado nga mga lalaki sa Brgy. San Lucas kahapon. Suno kay Chief Inspector Joven Arevalo, hepe sang Barotac Viejo Municipal Police Station, ginpahayag sang mag-utod nga sanday alyas Noynoy,20-anyos, kag alyas John John,15-anyos, nga malapit lang sila sa lugar sa diin nagpangita ang mga pulis kagab-e apang wala nakapangayo sang bulig bangud ginatayaan sila sang pusil. Ginahimo nga guide sang mga lalaki sa dalan suno sa ila aloy nga si alyas Inday ang mag-utod. Base naman sa panaysayon ni alyas John-John suno kay Arevalo, ginapamangkot sila sang mga suspetsado kun may nabal-an sila may kaangtanan sa shooting incident sa diin naulamid ang ila amay. Una na ginpahayag sang amay sang mag-utod nga siya ang ginatudlo nagtiro-patay sa isa ka personality. Ginpapauli sang mga suspect ang mag-utod suno sa iloy matapos ginpamangkot kun may nabal-an nga sikreto. (JoMaque)