Memorandum order halin sa DILG central office, ginahulat sang City DILG agud maserbe ang dismissal order kay Mayor Mabilog

Iloilo City — Ginahulat na lang sang city DILG ang memorandum order halin sa central office agud i-serbi ang dismissal order ni Mayor Jed Patrick Mabilog.   Suno kay City DILG Director Ferdinand Panes, ginalauman nila nga maimplementar ang order subong nga semana.   Kun mapatuman na suno sa iya ang mandu, mahatag sang direktiba ang DILG nga mangin alkalde si acting Mayor Joe Espinosa kag vice mayor si acting Vice Mayor Jeffrey Ganzon.  Mahimo man suno kay Panes nga makasumpa kanday Espinosa kag Ganzon sa DILG regional director, sa congressman ukon sa judge.

Order of Succession

Suno kay Panes, mabakante ang posisyon sang pagkamayor kun maimplementar ang order bisan mag-apelar pa si Mabilog bangud executory ini.  Gilayon nga mahatag sang order ang city DILG kay acting Mayor Joe Espinosa III suno kay Panes agud maka-assume na siya bilang alkalde sang syudad. Bangud mabakante ang posisyon sang pagka-vice mayor, maga-assume man si acting vice mayor Ganzon sa posisyon kasunod sang operation of law.  Ginpahayag man ni Panes nga ang partido ni  Ganzon ang magarekomenda sa magapungko nga bag-o nga councilor nga i-appoint naman ni Presidente Rodrigo Duterte.  Makapungko sa posisyon ang mga natungdan pagkatapos sang ila oath taking.

Samtang, magasapol naman si Ganzon kay Duterte sa Davao sa Nobyembre agud istoryahan nila kun sin-o ang maayo nga ibutang sa posisyon.  (JoMaque)