13-anyos nga dalagita sa Lambunao, patay sa disgrasya sang motorsiklo

Lambunao, Iloilo–Patay ang 13-anyos nga dalagita samtang pilason ang iya 18-anyos nga magulang matapos nadisgrasya ang ila motorsiklo sa Barangay Caninguan, Lambunao.

Suno kay PO2 Ramon Legayada, imbestigador sang Lambunao Police Station, si alyas Tin-Tin ang nagamaneho sang motorsiklo samtang angkas ang iya magulang nga si alyas Lan, lunsay pumuluyo sang Barangay Pajo sa amo nga banwa. Ginpahayag nga naga-practice sa pagmaneho si Tin-Tin sang natabu ang aksidente.

Sa imbestigasyon, nakasagaid ang motorsiklo sang mga biktima sa isa pa ka motorsiklo matapos nag-overtake. Nakabunggo pa gid sa nakapark nga Toyota Hilux ang motorsiklo.

Gindala sa ospital ang mag-utod apang napatay si Tin-Tin bangud ang pilas sa ulo. Padayon nga ginabulong sa ospital si Lan bangud sang pilas sa lain-lain nga parte sang iya lawas. May gasgas naman sa lawas ang driver sang motorsiklo nga nasagairan nga si Dave Camino, 33-anyos sang Cabunlawan, Lambunao. (AGB)