City Government, DSWD kag iban nga grupo, naghatag sang pauna nga bulig sa mga nasunugan sa Benedicto Jaro

Iloilo City — Ginhimo nga evacuation center sang mga nasunugan sa Benedicto, Jaro ang covered gym sa Jaro Plaza.  Suno kay Social Welfare Officer 3 Tirila Sibulinao sang City Social Welfare and Development Office, naghatag sila sang initial nga bulig nga tag-isa ka saku sang bugas kag 15 ka canned goods kada pamilya nga maka-igo sa sulod sang 14 ka adlaw.  Samtang naghatag ang Red Cross sang arroz caldo kag tinapay para sa mga nasunugan.

Nag-abot man ang masobra 300 ka beddings halin sa Philippine Chinese Chamber of Commerce matapos nga ginpakig-angutan ni Mayor Joe Espinosa. Ginpabutyag ni Sibulinao nga pwede man makahatag sang bulig pareho sang used clothings, beddings kag kitchen utensils bangud kalabanan sa mga nasunugan ang wala sang nasalbar nga kagamitan.

Ginatudlo nagsugod ang kalayo sa balay ni Reynaldo Ledesma apang ginasunod man sang Bureau of Fire Protection ang iban pa nga anggulo. Sa interview naman sang Aksyon Radyo kay Ledesma, ginpanginwala sini nga nagsugod sa ila balay ang kalayo. Suno sa iya, nakita niya nga naglatay ang kalayo sa linya sang kuryente sa likod sang ila balay kag gintinguhaan niya pa nga mapalong apang madasig ang pag-ibwal. (JoMaque)