PECO, naghingyo sa City Council nga mapresentar sang ila mga developments

Iloilo City–Nag-apelar ang taga-Panay Electric Company nga matambung sa session sang City Council sa masunod nga semana.

Suno kay Councilor Joshua Alim, nagpabalo si Councilor R. Leone Gerochi, chairman sang Committee on Public Utilities, sa hingyo sang PECO nga magpresentar sang ila developments kag mga plano. Kasunod ini sang resolution nga ginpasar sang Konseho kahapon nga nagapamatuk sa renewal sang franchise sang PECO. Si Councilor Ed Peñaredondo lang ang nag-abstain sa resolution samtang pabor ang nabilin nga mga konsehal.

Ginhingyo naman ni Alim ang mga barangay officials nga pasugtan ang pagpapirma sang petition sa ila lugar agud pamatukan ang renewal sang PECO franchise. Ginpahayag ni Alim nga nagresign ang chief tanod sang Barangay Navais, Mandurriao bangud wala ginpahanugutan ni OIC Punong Barangay Jimmy Capilijan ang pagpalapta sang petition nga iya gindihon. (AGB)