Probinsya sang Iloilo, nagapanguna sa may pinakamadamu nga kaso sang pag-abuso sa kababainhan kag kabataan sa Western Visayas

Iloilo City — Nagapanguna ang probinsya sang Iloilo sa may pinakamadamo nga kaso sang violence against women and children sa Western Visayas nga naglab-ot sa 670 halin Enero tubtub Oktubre, 2017. Ginsundan ini sang Aklan nga may 533; Iloilo City-472; Capiz-343; Antique-269 kag Guimaras-101. Gin-athag ni Chief Inspector Joem Malong, hepe sang Women and Children Protection Desk (WCPD) sang PRO 6 nga nagnubo ang crime volume sang violence against women and children ipaanggid sang nagligad nga tuig sa amu man nga period. Ang crime volume sang 2016 naglab-ot sa 3,408 samtang sa subong nga tuig, naglab-ot sa 2,338 ang kaso. Nakabulig sang dako suno kay Malong sa pagpanubo sang kaso ang kampanya nga ginahimo sang police kag iban pa nga ahensya sang gobierno kasubong sang DSWD, DILG kag Commission on Human Rights nga mapunggan ang violence against women and children. Ginhangkat  man ni Malong ang kababainhan nga indi magkahuya sa pag-report sa police kon sila ang gina-abusuhan. (JoMaque)