Anay team leader sang Panay Regional Party Committee sang NPA, nadakpan sa Laguna

Laguna — Na-aresto ang ginatudlo nga anay team leader sang Panay Regional Party Committee sa idalum sang Southern Front Committee sang New People’s Army sa Laguna.   Ginkonfirmar ni Senior Inspector Gerry Sangalan, provincial information officer, nga nadakpan sang gintingub nga pwersa sang intelligence agents sang Laguna kag Antique si Winston Cabaya Gilua, 49-anyos, alyas Nonoy kag alyas Ka Waway. Suno kay Sangalan, nag-coordinate ang intel branch sang Antique Police Provincial Office kag San Remigio, Antique Municipal Police Station sa Laguna Police Provincial Office kag Calauan Municipal Police Station agud maserbe ang arrest warrant batuk kay Gilua nga nagatrabaho nga laborer sa Barangay Mabacan, Calauan, Laguna. Wala sang piyansa nga ginrekomendar sa kahilwayan ni Gilua. Pirmado ni Presiding Judge Nery Duremdes sang RTC Branch 11 sa San Jose de Buenavista, Antique ang warrant of arrest nga napetsahan Setyembre 28, 2004. (JoMaque)