Congregation Of Clergy Sa Roma, Nagmandu Kay Father Esperidion “Boy” Celis Nga Bakantehon Ang St. Anne Parish Sa Molo ; Jaro Archdiocese Ginmanduan Nga Magbutang Sang Parish Administrator Sa Molo Kag Barotac Nuevo Parish Church

District of Molo – Nagpadala sang instruction letter ang Congregation for the Clergy sa Roma kasunod sang appeal ni Father Esperidion “Boy” Celis nga magpabilin siya sa St. Anne Parish sa Molo.

Ginkonfirmar ni Father Joenick Territorio, Episcopal Vicar for Chancery Affairs kag Canon Lawyer sang Jaro Archdiocese, nga nabaton ni Archbishop Angel Lagdameo ang sulat sang Roma sang Nobyembre 30. Ginamanduan suno kay Territorio si Father Celis nga bakantehon ang St. Anne Parish.

Nabutang man sa sulat nga butangan sang Parish Administrator ang St. Anne Parish Church kag St. Anthony Parish Church sa Barotac Nuevo, ang ginmandu kay Celis nga iya bag-o nga parokya.  Ginpahamtang sugod Disyembre 4 nga Parish Administrator sa Barotac Nuevo si Father Juan Fareñas nga kura paroko sang Dumangas samtang temporaryo nga ginbutang nga administrator sa Molo si Monsignor Maurillo Silva halin sa Pavia nga una na nakabaton sang mandu nga amo ang mangin kura paroko sa St. Anne Parish.

Posible suno kay Territorio nga nabaton na ni Father Celis ang instruction sang Roma rason nga ginpangkuha sini ang iya kagamitan lakip ang generator nga suno sa pari, iya ginbakal.  Epektibu subong nga adlaw ang reshuffling nga ginmandu ni Archbishop Lagdameo sa kaparian sang Archdiocese.

Una na nga nagbalibad si Celis nga magsunod sa mandu bangud ginhulat ang desisyon sang Roma kag ginrason nga wala pa natapos ang iya mission kag ginahawiran siya sang mga parokyano sa Molo.

(ATT)