PSTMO Head Jeck Conlu, nag-athag nga wala sang exempted sa traffic rules bisan pa mga armored cars

Iloilo City — Indi exempted ang mga armored cars sa traffic rules. Ini ang gin-athag ni Public Safety and Transportation Management Office (PSTMO) Head Jeck Conlu kasunod sa reklamo sang traffic enforcer nga ginkasahan siya sang pusil kag ginpakitaan sang dirty finger sang 2 ka security personnel nga sakay sang armored car sang Dasia Security Agency sang ginpunggan niya ang salakyan nga nagtuyo mag-U turn sa Lapaz.

Suno kay Conlu, wala sang exemption sa Land Transportation and Traffic Code of the Philippines bisan pa ang mga ambulansya kag fire trucks. Ginahatagan lang sila sang right of way sa tion sang emerhensya. Wala man nagapati si Conlu nga security protocol ang ginhimo nga pagkasa sang pusil sang personnel sang security agency sa traffic aide. Ginpahayag ni Conlu nga nagkasa ang guwardiya agud i-intimidate ang traffic aide. (JoMaque)