Guba nga karsada, ginreklamo sang taga-Misi, Lambunao

Lambunao, Iloilo–Gindangup sa Aksyon Radyo Iloilo sang residente sang Barangay Misi, Lambunao ang ginlaragway sini halos indi ma-agwantahan nga karsada sa barangay.

Suno sa wala nagpakilala nga babaye, naguba ang karsada bangud sang dalagku nga truck nga nagakarga sang balas kag bato halin sa quarry site sa Barangay Tampukaw. Naga-ulbo kag nagkalawasak na ang semento dugangan pa nga madulom ang karsada bangud wala sang streetlight gani madamo na sang na-aksidente nga motorsiklo. Nagpangabay ang babaye kay Lambunao Mayor Jason Gonzales nga solusyunan ang ila problema.

Nagpasalig naman si Mayor Gonzales nga may P5 million na nga budget para sa pagpakay-o sang karsada pero ini suno sa iya magakadto sa soil stabilization technology nga magapatig-a sang duta kag unahon ang mga portion nga tuman na gid ka lala sang sitwasyon. Posible sa Pebrero himuon ang bidding kag sa marso masuguran na ang pagkay-o sang karsada. (AGB)