LGBT member, nagdepensa sa akusasyon sang pulis nga iya ginhurikap sa lodging house sa Lapaz

Iloilo City–Nagdepensa ang call center agent nga miembro sang LGBT community sa akusasyon nga ginhurikap niya ang pulis sa sulod sang lodging house sa Lapaz.

Suno kay Edwin Pineda Jr y Paredes, 29-anyos sang Villa Hermosa, Lapaz, may pruweba siya sang pagbayluhanay nila sang text messages ni PO1 Joemon Ras Cainday, assign sa Traffic Investigation and Enforcement Section sang Iloilo City Police Office, nga makit-anay sila kag istoryahan ang ila mangin relasyon. Suno sa iya, nagdesisyon sila nga magkadtu sa Andok’s agud magpanyapon kag mag-inom. Ginpabutyag ni Pineda nga gin-istoryahan nila ni PO1 Cainday nga may matabu sa ila nga suno sa iya, ginpasugtan man sang pulis gani nagsulod sila sa lodging house. Apang ginpanghiwala ni Pineda nga ginpilit niya ang pulis. Suno kay Pineda, wala sang may natabu bangud ginposasan na siya sang pulis kag ginapaako kon siya ang nagaguba sang relasyon sini sa iban nga babaye.

Ginpanghiwala man ni Pineda nga siya ang tag-iya sang narecover nga suspected shabu. Suno kay Pineda, makapamatuod siya nga indi siya involved sa illegal drugs. Desidido si Pineda nga mag-file man sang kaso batuk sa pulis bangud indi niya mabaton nga nahuy-an siya kag naguba ang iya pangalan kasunod sang natabu.

Gin-relieve naman sa traffic investigation and enforcement section si PO1 Cainday. Nag-epekto ang relief order nga gin-isyu ni ICPO Director PSSUPT Henry Biñas sang Biernes.

Gin-relieve si Cainday samtang gina-imbestigaran sang investigation and detective management unit ang natabu sa ila ni Pineda. (AGB)